Livre

الحب لازمو يحررك، يزينك، يداؤيك، ينحيلك العقد، يضوي ثنيتك، يخليك ترقد وتقوم فرحانة، هو اليد اللي تطلعك الفوق و تحطك في مقام يليق بيك وتدزك القدام باش تخرج منك أحلى ما فيك

شنوة تعمل في حياتك؟ سألوكمشي نهار اللّي ما عملتوش في حياتك؟ شنيّة القراية اللّي تمنيت تقراها و ما قريتهاش؟ شنية الخدمة اللّي تمنيت تخدمها و ماخدمتهاش ؟ شنوّة السبور اللّي تمنّيت راك ترانيتو في الصغرة سنين؟ شكون الانسان اللّي حبّيتو و ما حبّكش؟ شنيّة الريحة اللّي ترجّعك غشّير عمرو أربعة؟ شنوّة يخوّفك؟ شنوّة اللّحن اللّي كي تسمعو تخرج من سينتك؟ شنيّة الغناية اللّي تحسّها تحكي عليك؟ شنوّة السرّ اللّي تحشم بيه و قعد مخبي في وسطك و عمرك لا حكيتو لحد؟ كيفاش عاودت قمت بعد آخر تكسيرة تفتفتت فيها روحك؟ أناهو أكثر كتاب أثّر فيك؟ قدّاش من مرّة حسّيت روحك وحدك و انت بين العباد؟ شنوّة تعنيلك الحريّة وهل انّو لحمك يتقشعر كي تسمع السولاميّة؟ شنوة الفيلم اللّي بكيت فيه من جواجيك؟ شكون حبّك الأول؟ أحكيلي عليه و على خزرتو و لون عينيه؟

بش نفعل,بش نجرب,باش نسعى,باش نبدل حاجات في روحي,باش نبني , باش نواجه,بش نخلق الفرص,باش نصقل موهبتي في عوض ماني قاعدة نقتل فيها. باش نخدم مع الصغار و الكبار على نصوص و ارتجال و نخرج الصيحة اللي عندهم الداخل و غامينها, و الغصة و الهبلة و التخبيلة و التشكبينة لازمها تولي إبداعو أحلام و جمال و صقلان و شطيح و دموع و شكوك و تراك و طياح و نجاح و طيرة, آما خدمتي الأولة باش تكون قبولي آنا لروحي كيما هي, أني نعيش معاها باهتزازاتها و إنكساراتها و عقدها و صحيحها و غالطها و يمينها و يسارها و نورها و ظلامها و نسيبها على طلق ذراعها من غير ما يحكم لا عليها لا فيها حد, بعيدا عن ديكتاتورية الموضة و الجمال المزيف و ديكتاتورية الجهل و الدهماء. باس نكون كيما نحب انا نكون," و سأبقى حيث الرقص و الغناء لأن الأشرار لا يرقصون و لا يغنون"

ول مرة كي تشوف إسمك على كتاب تحس روحك باش تطير بالفرحة وفي فرد الوقت تحب تبكي، كينك جبت صغير للعالم هذا، فما شيرة منك فيه، فيه من إحساسك ومن روحك بعمرو لا جاء لبالي باش نكتب كتاب، ودايوغ مافما حتى مكتب تنجم تقرى فيه باش تتخرج كاتب، كي الدنيا نهار مالنهارات تكتبلنا حاجة موش قارينلها حساب، والا تورينا وجه متاعنا ما نعرفوهش، آما اللي نعرفو اللي آنا ماخممتش بمخي باش خرج أسرار عائلية، قلبي نطق وعرى عالمخبي وراء البيبان ، وراء التصويرة اللي يشوفوها الناس، حفرت في الشخصيات ودخلت لداخل وحكيت عاللي ما يحب حد يحكي عليه، على ضعف الإنسان، اللحظات اللي يكره فيهم روحو... آما الدنيا ديما تعطينا زوز حلول يا نكملو في الثنية اللي بديناها ونعيشو تعساء ، يا في وسط الثنية نقررو نواجهو رواحنا ومافماش ما أصعب من أنك تواجه تصويرتك الحقانية، تدخل في وسط روحك وتنظف، وتداوي وتتحرق بوجيعة الجرح مالأول ومن بعد يتلم وتقعد السيكاتريس، السيكاتريس هذيكا ثنية حياتنا، ماعادش توجع آما تقعد ماتتنحاش وتحكي حكاية ... الكتاب يحكي ويعالج برشة قضايا، بعضهم ماتكتب عليه شي في تونس إلى يوم الناس هذا، فيه بلايص وديكورات وروايح نعرفوهم الكل وكبرنا بيهم.. لغتو ساهلة آما خدمت فيه على استيتيقا اللغة الدارجة، الدارجة متاعنا لازمها تعيش وتنجم تحمل صور شاعرية مزيانة برشة بعيدا على الكليشيات..

قعدت ساعة ساعة نتلمّحها في فرح من بعيد، تزيد ناري تلهب و نمرض و نروّح عزينينقبل العزاء لين قرب وقت مرواحي للبلاد خاطر الخدمة اللّي مشيت على خاطرها في القرية هذيكا قريب توفى. وقتها صارت المعجزة! ما نعرفش لو كاني معجزة و لا رحمة من عند ربّي باش يبرّدلي كنيني... المفيد اللّي المرا اللّي حبّيتها تعاركت مع راجلها و بالتنرفيز خرج من سينتو و طلّقها بالثلاث و بعدها ندم و كلى البصل و حبّ يرجّعها. آما الشريعة واضحة في الحكاية هاذي، ما فمّا حتّى راجل ينجّم يرجّع مرتو بعد ماطلّقها بالثّلاث كان امّا تعرس براجل آخر. و جرت العادة و العرف بأنهم يعرّسوا للمرا هذيكا براجل على ليلة وحدة و يحلف بيمين على شرفو أنو يطلقها من غدوة. الراجل المحلل هذا اسم تيّاس.

آاااااي عندي وجيعة وجيعـة تشـوي، تشوشـط، تقرص، تسـطر، تـدڤ، تحـرق. قالـولي حريّة، قلتلهـم ربطيّـة وحبس بحكـم مؤبّد, عالم مدردر، مزفطر، رهدان، سكبان، واطي، مخاوز، دوني … عالم سيّب ضبوعتو، ليل هيّج ذيوبتو. مغاغـر بحنوشـاتهم، بحـورات ببالّعاتهـم، صحـاري بعواصفهـم، قوايـل بشـواطنهم، وانـا نتفـرج ونبلـع ونغص. نحب نحمر ونحرقص وندبّغ، نحب نكحل ونَصبغ ونتصّدر، نحب نبكي ونصيح ونعيّط، نحب نفرح ونغنّي ونشطح، نحب نكس! نحب ندڤدڤ واللي يجي قدامي نمشيه زيزي، يا دنيا وينك توّحشتو زينك .... جاوبنـي، كلمنـي، عنّقنـي، أمسـحلي دمعتـي، طبطبـلي عـلى كتفـي وقـلي علاش؟ تـي عـلاش يصـر فيّا هـذا الـكل؟